Obrar amassa - Un camin novèl per l'Institut d'estudis occitans

Vos convidam a sosténer aqueste projècte per l'Institut d'estudis occitans (IEO) en prevision de l'amassada generala de l'associacion que se farà los 9, 10 e 11 de mai de 2025 a Bordèu. Per aquò, podètz signar, tal coma se fariá per una peticion.

Data limita per signar : lo 30 d'abril de 2025.

-- Version lengadociana --

OBRAR AMASSA

UN CAMIN NOVÈL PER L’INSTITUT D’ESTUDIS OCCITANS

PREAMBUL

Sèm un collectiu de femnas e d’òmes, membres « istorics » o recents de l’IEO, a diferents escalons de la siá ret, e que ne representam la panoccitanitat. Çò que nos recampa bèl primièr es l’insatisfaccion per quant al foncionament actual de l’IEO e la volontat de li far prendre un autre camin. Quitar lo camin actual de l’entre-se e de l’atentisme per lo d’una paraula occitanista que siá paraula de vida, obèrta al mond. Un camin de l’accion, de la creacion, de las experimentacions, de l’audàcia e de l’invencion. Nòstra lenga-cultura deu èsser capabla de portar pèira a un projècte de societat democratica, multiculturala, respectuosa, umanista, solidària. Se, per aquò far, lo camin passa per una politica de mai granda coneissença e de vertadièra reconeissença publica de la cultura occitana, passa tanben per la mesa al punt d’un projècte renovelat per l’IEO, un projècte ambiciós, fòrt, a la nautor dels enjòcs contemporanèus. En clar : un projècte que rompa francament ambe la politica estequida, ierarquica e nefasta de l’actual C. A. de l’IEO federal.

Dins aquesta amira, l’IEO se deu donar un C. A. novèl, capable de satisfar aitant las exigéncias d’un militantisme del succès, lo d’una basa – locala, departamentala e regionala – sense la quala l’IEO es pas res, coma las exigéncias d’una representacion efectiva e eficaça als nivèls nacional e internacional.

ÇÒ QUE VOLÈM :

1) un foncionament associatiu democratic :

transformarem e clarificarem lo foncionament intèrne de l'IEO e sos estatuts per mai de democratizacion (limitacion dels mandats, collegialitat, representacion dels salariats a cada escalon del malhum, pòrta-paraula plan definit…);

inversarem l’esquèma ierarquic actual : que l’administracion del malhum siá plan lo fruch d’un trabalh collaboratiu entre cada escalon del malhum;

2) de finanças rigorosas :

prepausarem una gestion transparenta dels comptes (audit financièr) e de las adesions amb una organizacion e una reparticion equitabla que convenga a tot lo monde;

trabalharem a una autonomia economica (autofinançament, finançament privat e creacion d’una fondacion);

3) un malhum inclusiu e solidari :

afortirem la mixitat de genre, sociala, generacionala…

compartirem las competéncias, benevòlas e salariadas, e metrem en plaça una caissa de solidaritat per las associacions;

4) de pedagogia per transmetre la lenga :

melhorarem l’ofèrta de corses pels adultes e las proposicions d’accions culturalas, amb una difusion larga e inclusiva;

teisserem de ligams novèls cap a la formacion professionala e l’universitat;

5) un malhum IEO virat cap al mond :

trabalharem sus mai d’obertura e de cooperacion cap al monde de totas las zònas occitanofònas e cap a las autras lengas e culturas, particularament las minorizadas;

investirem d’endreches que la lenga, lo païsatge, la cultura i tenon o i tendràn un ligam poderós (Ostals de jovents, Pargues nacionals e regionals d’Occitania tota, Musèus d’Arts e Tradicions Popularas, Clubs esportius…); 

6) mai de plaça pels joves :

crearem una seccion joves al nivèl federal amb una plaça dins la governança, una adesion a tarifa redusida e obèrta als menors;

reactivarem de ligams concrèts entre las escolanas e los escolans d’occitan e los espacis de socializacion de la lenga;

7) mai de plaça per la creacion e l’experimentacion :

reviscolarem un sector artistic per favorizar la creacion;

emplegarem la creacion coma utís per valorizar las accions de l’IEO e prepausarem l’ajuda d’artistas als escalons del malhum;

8) una politica d’edicion e de difusion :

tornarem definir la politica editoriala d'IDECO per velhar a la qualitat, al seriós e a l’ambicion del trabalh d’edicion;

trabalharem a una difusion de las òbras editadas pel malhum IEO;

9) una comunicacion eficaça :

crearem de supòrts de comunicacion especifics a destinacion de cada public per espandir l’idèa de l’IEO;

tornarem definir la comunicacion intèrna (Anem Occitans !);

obrarem a la creacion e a la promocion de contenguts novèls (ràdio, TV, numeric, rets socialas, premsa…);

Per contactar lo collectiu : [email protected]

-- Version provençala --

OBRAR ENSEMS

UN CAMIN NOVÈU PER L’INSTITUT D’ESTUDIS OCCITANS

PREAMBULE

Siam un collectiu de fremas e d’òmes, membres « istorics » o recents de l’IEO, a diferents escalons de sa ret, e que ne'n representam la panoccitanitat. Çò que promier nos recampa es l’insatisfaccion per quant au foncionament actuau de l’IEO e la volontat de li faire prendre un autre camin. Quitar lo camin actuau de l’entre-se e de l’atentisme per lo d’una paraula occitanista que siegue paraula de vida, obèrta au monde. Un camin de l’accion, de la creacion, deis experimentacions, de l’audàcia e de l’invencion. Nòstra lenga-cultura deu èstre capabla de portar pèira a un projècte de societat democratica, multiculturala, respectuosa, umanista, solidària. Se, per aquò faire, lo camin passa per una politica de mai granda coneissença e de vertadièra reconeissença publica de la cultura occitana, passa tanben per la mesa au ponch d’un projècte renovelat per l’IEO, un projècte ambiciós, fòrt, a l'auçada deis enjuecs contemporanèus. En clar : un projècte que rompe francament ambé la politica estequida, ierarquica e nefasta dau C. A. actuau de l’IEO federau.

Dins aquesta amira, l’IEO se deu donar un C. A. novèu, capable de satisfaire tant leis exigéncias d’un militantisme dau succès, lo d’una basa – locala, despartamentala e regionala – sensa la quala l’IEO es pas ren, coma leis exigéncias d’una representacion efectiva e eficaça ai nivèus nacionau e internacionau.

ÇÒ QUE VOLÈM :

1) un foncionament associatiu democratic :

transformarem e clarificarem lo foncionament intèrne de l'IEO e seis estatuts per mai de democratizacion (limitacion dei mandats, collegialitat, representacion dei salariats a cada escalon dau malhum, pòrta-paraula ben definit…);

inversarem l’esquèma ierarquic actuau : que l’administracion dau malhum siegue vertadierament lo fruch d’un trabalh collaboratiu entre cada escalon;

2) de finanças rigorosas :

prepausarem una gestion transparenta dei comptes (audit financier) e deis adesions amb una organizacion e una reparticion equitabla que convèngue a cadun;

trabalharem a una autonomia economica (autofinançament, finançament privat e creacion d’una fondacion);

3) un malhum inclusiu e solidari :

afortirem la mixitat de genre, sociala, generacionala…

compartirem lei competéncias, benevòlas e salariadas, e metrem en plaça una caissa de solidaritat per leis associacions;

4) de pedagogia per transmetre la lenga :

melhorarem l’ofèrta de cors per leis adultes e leis proposicions d’accions culturalas, amb una difusion larga e inclusiva;

teisserem de ligams novèus devèrs la formacion professionala e l’universitat;

5) un malhum IEO virat vèrs lo monde :

trabalharem sus mai d’obertura e de cooperacion vèrs lo monde de totas lei zònas occitanofònas e vèrs leis autrei lengas e culturas, particularament aquelei que son minorizadas;

investirem d’endrechs que la lenga, lo païsatge, la cultura i tenon o i tendràn un ligam poderós (Ostaus dei joves, Pargues nacionaus e regionaus d’Occitania tota, Musèus d’Arts e Tradicions Popularas, Clubs esportius…); 

6) mai de plaça per lei joves :

crearem una seccion joves au nivèu federau amb una plaça dins la governança, una adesion a tarifa redusida e obèrta ai menors;

reactivarem de ligams concrèts entre leis escolanas e leis escolans d’occitan e leis espacis de socializacion de la lenga;

7) mai de plaça per la creacion e l’experimentacion :

reviscolarem un sector artistic per favorizar la creacion;

emplegarem la creacion coma otís per valorizar leis accions de l’IEO e prepausarem l’ajuda d’artistas ais escalons dau malhum;

8) una politica d’edicion e de difusion :

tornarem definir la politica editoriala d'IDECO per velhar a la qualitat, au seriós e a l’ambicion dau trabalh d’edicion;

trabalharem a una difusion deis òbras editadas per lo malhum IEO;

9) una comunicacion eficaça :

crearem de supòrts de comunicacion especifics a destinacion de cada public per espandir l’idèa de l’IEO;

tornarem definir la comunicacion intèrna (Anem Occitans !);

obrarem a la creacion e a la promocion de contenguts novèus (ràdio, TV, numeric, rets socialas, premsa…);

-- Version lemosina --

OBRAR AMASSA

UN CHAMIN NOVEL PER L’INSTITUT D’ESTUDIS OCCITANS

PREAMBUL

Sèm un collectiu de femnas e d’òmes, membres « istorics » o recents de l’IEO, a diferents esbalhons de l’eschala, e que ne’n representam la panoccitanitat. Çò que nos rechampa de’n prumier ’qu’es l’insatisfaccion del foncionament actual de l’IEO e la volontat de i far prener un autre chamin. Quitar lo chamin d’aura de l’entre-se e de l’atentisme per lo d’una paraula occitanista que siá paraula de vita, druberta al Monde. Un chamin de l’accion, de la creacion, de las experimentacions, de l’audàcia e de l’invencion. Nòstra lenga-cultura deu èsser en mesma de portar sa pèira ad un projècte de societat democratica, multiculturala, respectuosa, umanista, solidària. Se, per aquò far, lo chamin passa per una politica de mai granda coneissença e de vertadièra reconeissença publica de la cultura occitana, passa tanben per la mesa al punt d’un project renovelat per l’IEO, un project ambiciós, fòrt, a la nautor deus enjòcs d’anuech. En clar : un projèct que copèssa franc emb la politica regrautida, ierarquica e nefasta de l’actual C. A. de l’IEO federal.

Dins aquesta amira, l’IEO se deu donar un C. A. novèl, em mesma de satisfar tant las exigéncias d’un militantisme del succès, lo d’una basa – locala, departamentala e regionala – sense la quala l’IEO es pas res, coma las exigéncias d’una representacion efectiva e eficaça aus nivèus nacional e internacional.

ÇÒ QUE VOLÈM :

1) un foncionament associatiu democratic :

transformarem e clarificarem lo foncionament intèrne de l'IEO e sos estatuts per mai de democratizacion (limitacion deus mandats, collegialitat, representacion deus salariats a chade esbalhon del malhum, pòrta-paraula plan definit…) ;

inversarem l’esquèma ierarquic actual : que l’administracion del malhum siá plan lo fruch d’un trabalh collaboratiu entre chade esbalhon del malhum ;

2) de finanças rigorosas :

prepausarem una gestion transparenta deus comptes (audit financièr) e de las adesions emb-d’una organizacion e una reparticion equitabla que convenguèssa a tot lo monde ;

trabalharem ad una autonomia economica (autofinançament, finançament privat e creacion d’una fondacion) ;

3) un malhum inclusiu e solidari :

afortirem la mixitat de genre, sociala, generacionala…

compartirem las competéncias, benevòlas e salariadas, e botarem en plaça una caissa de solidaritat per las associacions ;

4) de pedagogia per transmetre la lenga :

amelhorarem l’ofèrta de cors peus adultes e las proposicions d’accions culturalas, emb-d’una difusion larga e inclusiva ;

teisserem de liams novèus vers la formacion professionala e l’universitat ;

5) un malhum IEO virat cap al mond :

trabalharem sus mai de drubertura e de cooperacion cap al monde de totas las zònas occitanofònas e vers las autras lengas e culturas, particularament las minorizadas ;

investirem d’endrechs que la lenga, lo païsatge, la cultura i tenon o i tendrán un liam poderós (Ostaus de jovents, Pargues nacionaus e regionaus d’Occitania tota, Musèus d’Arts e Tradicions Popularas, Clubs esportius…) ; 

6) mai de plaça peus joves :

crearem una seccion joves al nivèl federal emb-d’una plaça dins la governança, una adesion a tarifa redusida e druberta aus menors ;

reactivarem de liams concrèts entre las escolanas e los escolans d’occitan e los espacis de socializacion de la lenga ;

7) mai de plaça per la creacion e l’experimentacion :

reviscolarem un sector artistic per favorizar la creacion ;

emplejarem la creacion coma gatges per valorizar las accions de l’IEO e prepausarem l’ajuda d’artistas aus escalons del malhum ;

8) una politica d’edicion e de difusion :

tornarem definir la politica editoriala d'IDECO per velhar a la qualitat, al seriós e a l’ambicion del trabalh d’edicion ;

trabalharem ad una difusion de las òbras editadas pel malhum IEO ;

9) una comunicacion eficaça :

crearem de supòrts de comunicacion especifics a destinacion de chade public per espandir l’idèa de l’IEO ;

tornarem definir la comunicacion intèrna (Anem Occitans !) ;

obrarem a la creacion e a la promocion de contenguts novèus (ràdio, TV, numeric, rets socialas, premsa…) ;

-- Version française --

OEUVRER ENSEMBLE

UN NOUVEAU CHEMIN POUR L’INSTITUT D’ETUDES OCCITANES

PRÉAMBULE

Nous sommes un collectif de femmes et d’hommes, membres historiques ou récents de l’IEO, à différents échelons de son réseau et dont nous représentons la panoccitanité. Ce qui nous rassemble avant tout, c’est l’insatisfaction quant au fonctionnement actuel de l’IEO et la volonté de lui donner un autre chemin. Quitter le chemin actuel de l’entre-soi et de l’attentisme pour celui d’une parole occitane qui soit parole de vie, ouverte au monde. Un chemin de l’action, de la création, des expérimentations, de l’audace et de l’invention.

Notre langue-culture doit être capable de porter sa pierre à un projet de société démocratique, multiculturelle, respectueuse, humaniste, solidaire. Pour ce faire, si le chemin passe par une politique de plus grande connaissance et de véritable reconnaissance publique de la culture occitane, cela implique également la mise au point d’un projet renouvelé pour l’IEO, un projet ambitieux, fort, à la hauteur des enjeux contemporains. En clair :  un projet qui rompe franchement avec la politique étriquée, hiérarchique et néfaste du C.A. actuel de l’IEO fédéral.

Dans cette perspective, l’IEO doit se donner un nouveau C.A., capable de satisfaire à la fois les exigences d’un militantisme du succès, celui d’une base - locale, départementale et régionale - sans laquelle l’IEO n’est rien, tout autant que les exigences d’une représentation effective et efficace aux niveaux national et international. 

CE QUE NOUS VOULONS :

1) un fonctionnement associatif démocratique :

Nous transformerons et clarifierons le fonctionnement interne de l’IEO et ses statuts pour plus de démocratisation (limitation des mandats, collégialité, représentation des salariés à chaque échelon du réseau, porte-parole clairement désigné…).

Nous inverserons le schéma hiérarchique actuel, afin que l’administration du réseau soit effectivement le fruit d’un travail collaboratif entre tous ses échelons;

2) des finances rigoureuses :

Nous proposerons une gestion transparente des comptes (audit financier) et des adhésions, avec une organisation et une répartition équitable qui convienne à tout le monde.

Nous travaillerons à une autonomie économique (autofinancement, financement privé et création d'une fondation).

3) un réseau inclusif et solidaire :

Nous renforcerons la mixité de genre, sociale, générationnelle…

Nous partagerons les compétences, bénévoles et salariées, et mettrons en place une caisse de solidarité pour les associations.

4) de la pédagogie pour transmettre la langue :

Nous améliorerons l’offre de cours pour adultes et les propositions d’actions culturelles, avec une diffusion large et inclusive.

Nous tisserons des liens nouveaux vers la formation professionnelle et l’université.

5) un réseau IEO tourné vers le monde :

Nous travaillerons pour plus d’ouverture et de coopération avec les gens de toutes les zones occitanophones et vers les autres langues et cultures, en particulier celles qui sont minorisées.

Nous investirons des lieux dans lesquels la langue, le paysage, la culture tiennent et tiendront un lien puissant (Maisons des jeunes, Parcs nationaux et régionaux de toute l’Occitanie, Musées d’Arts et Traditions Populaires, Clubs sportifs…); 

6) plus de place pour les jeunes :

Nous créerons une section jeunes au niveau fédéral avec une place dans la gouvernance, une adhésion à tarif réduit et ouverte aux mineurs.

Nous réactiverons des liens concrets entre les élèves d’occitans et les espaces de socialisation de la langue.

7) plus de place pour la création et l’expérimentation :

Nous ranimerons un secteur artistique pour favoriser la création.

Nous emploierons la création comme outil pour valoriser les actions de l’IEO et proposerons l’aide d'artistes aux échelons du réseau.

8) une politique d’édition et de diffusion :

Nous redéfinirons la politique éditoriale d’IDECO pour veiller à la qualité, au sérieux et à l'ambition du travail d’édition.

Nous travaillerons à une diffusion des oeuvres éditées par le réseau IEO.

9) une communication efficace :

Nous créerons des supports de communication spécifiques à destination de chaque public pour diffuser l’idée de l’IEO.

Nous redéfinirons la communication interne (Anem Occitans !).

Nous travaillerons à la création et à la promotion de contenus nouveaux (radio, TV, numérique, réseaux sociaux, presse…).

Pour contacter le collectif : [email protected]